Articles-مقالات

الرئيسة

علمتنا الأيام أن الشعوب أقوى من جلاديها وهمست في آذاننا الأحداث أن ساعة التغيير قادمة

Contact Us

رسالتنا

www.arabissues.com (903)352-8872 E-Fax (360)-283-6423

راسل الكاتب

برقيات سريعة من صاحبة الجلالة

آخر تحديث 04/ آذار/2010

معالي وزير الزراعة بعد كل هالفضايح اللي صارت جايين تتفششوا بعمال المياومة المثل بقول: مثل ما بتزرع بتحصد ، ووزارة مليانة فساد شو بدها تحصد ... أكيد لو زرعت قمح بطلع كرسنّه واللي ما بعرف شو الكرسنّة يسأل حمير البلد

إلى المعلمين في الأردن يا جماعة إذا وزارة التربية قالعة عيونكو ، لا تدقوش بالاولاد وتقلعوا عيونهم، العين بالعين صحيح ، بس مش عيون الطلاب ... الأولى فيكو تقلعوا عيون الحكومة ...

إلى السيد نبيل المومني ليش عامل هالحملة على الصحفيين ؟ هل بتتوقع إنك توصل لمرتبة أعلى من هيك ؟ شوف يا ابن عمي ، أنا شفقان عليك .. انته من عشيرة لو ولعت اصابعك شمع للحكومة ما راح توصل أكثر من هيك .. تاريخ ومعروف ... خلال السبعين سنة اللي مضت ولا حدا من قرايبك وصل أكثر من عميد أو عقيد ... انته بتعرف هالحكي كويس وأكثر مني وقصصهم عندك من فلان لعلان ... الكلمة الحرة ثمنها غالي والصحفيين الشريفين رايحين يدفعوا ثمن كلمتهم ، والغلبة إلهم حتى لو ماتوا أو قتلوا مش بس انسجنوا ... لكن والله ونصيحة من مشفق ... سيبك من هالشغلة ولا تخلي الخطايا الوطنية تتعلق برقبتك ... حتى لو وصلوك لأعلى رتبة في البلد ، صدقني الموضوع كله ما بيستاهل ... ظلم شخص واحد مظلمة أمام رب العالمين ... فهل أنت على قدر مواجهة ربك من أجل حفنة عكاريت... يا زلمة عمر بن الخطاب وقفته مره بنص خطابه ، عمر احترمها وقدر كلمتها وما حولهاش لمحكمة أمن الدولة ... صدقني كل اللي بنتقدوهم الصحفيين ما بوصلوا لعند كندرة عمر المقطعة ... فكيف بدك الناس ما تحكيش عليهم ... انجو بنفسك يا نبيل لأنك قدام ربنا مش رايح تلاقي أي واحد من هالحفرتلية اللي بتدافع عنهم يدافع عنك "كل نفس بما كسبت رهينة" حقك علي أقدملك النصيحة وهي الطريقة الوحيدة اللي ممكن أوصلك فيها الحكي وتسلم.

إلى "النبيلين" د. نبيل الشريف والسيد نبيل المومني مدير دائرة المطبوعات والنشر ... تحيات صحفية حرة كثير ... شو يا جماعة واحد منكو بطبل والثاني برقص ... الصحفيين داخلين وطالعين من السجن ...؟ خاف الله لقيتولكوا شغلة بعد قانون المطبوعات الجديد ... لا وشو ... حرية صحافة وحرية رأي .... لو كنتو بتحبوا الأردن والأردنيين .. استقيلوا ... أكيد وصلتوا التقاعد ولو ما وصلتوا ..ما تخافوش الرزق على الله ... بس بصراحة مسختوا سمعة البلد .. أي والله كل الفساد من بيع الدم للكلاوي للعيون لبيع الأرض والانتحار وكل شي بصير كوم واللي بتعملوه كوم... اسمعوا قدموا استقالاتكوا ولو ما لقيتوا شغل صدقوني لأدبرلكوا شغل عندنا في المطاعم .. والله بتجيبوا راتب أكثر من اللي بتستلموه والأهم من هذا كله ما بتظلموش حدا ...		الدكتور نبيل الشريف

* إلى سعادة الدكتور محمود الشياب .. بحق نقدم لك كل تحية ، سمعنا الأخبار حول نجاح إدارتكم في مستشفى الملك المؤسس "قمتوا بالواجب" وربنا ما بضيع أجركم كانوا دائما بقولولنا " السواقة فن ذوق أخلاق" والحقيقة الإدارة كمان "فن ذوق أخلاق" ونضيف لها "القدوة" " The Roll model وبما سمعناه عنكم يتضح أن سعادتكم كنتم القدوة الحسنة للأطباء والممرضين والموظفين ولهذا نجح المستشفى وحاز على الرضا المطلوب.. "من لا يشكر الناس لا يشكر الله" نشكركم على جهودكم المخلصة -إن شاء الله- وبالتأكيد كل الشكر للفريق الإداري والموظفين والأطباء ولكل العاملين وبظل الأردن "حلو برجاله" وما تزعلنش يا ستات "الأردن أحلى "بنسوانه" ودمتم جميعا للوطن *****		الدكتور محمود الشياب مدير مستشفى الملك عبدالله المؤسس
* إلى حبيب الشعب أبو زيد .. رئيس الوزراء حضرتك أرسلت خطاب حامي كثير ... أحمى من محماسة القهوة صباح عيد من أعياد زمان وقبل طاحونات القهوة ومحماس القهوة الجديدة اللي عالكهرباء. بتقول انه ما بهمك استرضاء الناس ووزارتك مش وزارة شعبية ... حابب أسألك يا بو زيد ... من أميت الوزارات شعبية وبهمها رضا الناس ... طول عمر الشعب بوكل خوازيق من عهد عمك ومروراً بوالدك وانتهاء بآخر رفاعي سيتولى رئاسة الوزارة ... اطمئن ... الوزارة عمرها ما كنت للشعب ... ولا عمرها كانت وزارة أردنية ... احنا أيتام وأبونا مات في الحرب وأمنا اتجوزها المحتل .... ما ظل النا أي حق نحكي فيه ... وتسلم ... يا رجل شو اللي مسكر عليه بيدك... لا يكون الخازوق ... بس حد علمنا ومن تجربتنا وتجربة أجدادنا انها خوازيق الرفاعية مباركة وحجمها أكبر من عمود كهرباء ... يا رب تيجي فتاحة وتقرالك الكف على شان تفتح ايدك ...

معالي وزير الزراعة تحية طيبة أطيب من كنافة المصري ، حلوة ،أحلى من بطيخ الغور ، وطويلة أطول من فقوس اشتفينا ، رفيعة أرفع من فاصوليا الغور أو خصر هيفاء وهبة، زاكية أزكى من حصرم السلط ، رقيقة أرق من ريح الصبا ، عذبة ، أعذب من مية عين التيس ، رائعة أروع من متعب السقار، سميكة ، أسمك من الجرب على جلد "الزط "، وسيمة ، أوسم من كاظم الساهر وهو بغني "أحبها وتكرهني" ... ثم أما بعد ... يا رجل بقولوا الدنيا صارت غلال بزمنك ، النهب شغّال في الوزارة من كثر المصاري ، والبطيخة بدها جمل ليحملها أو زلمة جهام مثل "سيد زيان" ، وبقولوا الخيار طولان وصاير مثل خوازيق تركيا بزمانها ، وبقولوا انه القمح صاير غلال والسنبلة فيها مليون حبة وبتعمل شوالين قمح ، وبحكوا العواجيز انه عامل المياومة بقبض أكثر من وزير في الوزارات الثانية ... شو يا رجل ، كل هالنجاحات ومش ناوي تستقيل ؟ نصيحتنا الك تنسحب بمية وجهك بدل ما يوصلك طرد مع المراسل اللي بقدملك الشاي والقهوة ....

إلى وزير التربية والتعليم في الأردن الدكتور إبراهيم بدران معاليك حلفت اليمين وأعطيت العهد واحنا مصدقينك مئة بالمئة تبقى المسألة اللي حصلت مرتبطة بالكفاءة .... إما أن تستقيل أو أن تحتمل لسان صاحبة الجلالة ... خصوصاً أنه عرشها قوي ومتين ومن وراء المحيطات ولا نتبع سياسة تمجيد الوزير وشتم الزبال في الوزارة ، ... "الهواة" بتيجي بالراس وانته حر ...		د . إبراهيم بدران
إلى السيد ... رئيس بلدية .... وصل إلى مسامع صاحبة الجلالة أن سيادة رئيس البلدية حضر عشاء عمل في العاصمة بمبلغ 500 دينار. طلبنا من المصدر الوثيقة وصورة عن الفاتورة ... وإن صح الخبر ستكون لنا حكاية طويلة وبرقيات ضروري تقرأها ... سألت أحد أساتذتي حول مسألة عشاء عمل لرئيس بلدية فرد "هذا ......" هذا لا يحدث إلا في بلادكم . البلدية مش بزنس ، البلدية خدمات وكل حفلاتها بتصير بأرضها مو بالعاصمة. شوارع بلدك مثل العمى والصوان كسر السيارات لأنه قرايبك مش كلهم قادرين يشتروا "س يو في" SUV ... احنا بانتظار الوثائق واللي بتتضمن صفقات كثيرة مش مشروعة وبعدها رايحين ننشر الأسماء والصور بالألوان إن شاء الله.		هنا ستكون صورة رئيس البلدية وصور الوثائق بالألوان في حالة انه مصدرنا وفى بالوعد وطيرلنا الوثائق ...

قضايا عربية www.arabissues.com
arabissues@gmail.com

* حقوق الطبع والنشر غير محفوظة بشرط ذكر اسم الكاتب و الموقع عند النقل
* كل كاتب يعبر عن رأيه "وذنبه على جنبه" والموقع وإدارته لا علاقة لهما بما ينشر